Erakundeak mintzodromoak antolatu ditu 65 herritan
AEKk 12. eguna: eta izango gara! izeneko ekimena iragarri zuen euskararen aldeko lasterketaren balorazioan, martxoaren 30ean.
Horren baitan, bi ekintza burutu(ko) ditu: Batetik, mintzodromoak, Praktitatu-AEKren eskutik. “Maiatzaren 21ean inoiz baino euskara gehiago entzutea” nahi du AEKk; hori dela-eta, 65 mintzodromo antolatuko ditugu egun horretarako, Euskal Herriaren luze-zabalean.
Maiatzaren 21ean, Elkarrizketa eta Garapenerako Kultur Aniztasunaren Nazioarteko Egunean, AEKren Praktikatu zerbitzuak aldarrikapen bat egin nahi du: “oraindik ere euskaraz espazioak behar direla euskaraz praktikatzeko eta bizitzeko, eta mintzapraktika-egitasmoetan parte hartzea horretarako abagunea dela”.
Informazioa gehiago eta izen-emateak: www.korrika.eus/etaizangogara eta AEKren euskaltegietan.
Bestetik, apirilaren 22an ordubeteko eskola eskaini zuen AEKk, doan, hainbat euskaltegitan. Hasiera-mailako klaseak izan ziren, oraindik euskarara inoiz hurbildu ez direnentzat, hizkuntzarekin lehen hartu-emana izan dezaten.
“12. eguna: euskara gara eta izango gara” ekimenaren bidez, AEKk Euskal Herri osoari erakutsi nahi dio zer eskaini ahal duen euskararen pizkunderako: “Beti esan dugu ez dela nahikoa Korrikan parte hartzea, hurrengo eguna ere garrantzitsua dela: benetako lanketa, konpromisoa, behin Korrika igarota dator. Asmo handiko helburuak ditugula abiatzen dugu lasterketa, baina Korrika bera labur geratzen zaigu askotan, eta 11 egun horietatik harago joan behar dugu”; hortik datorkio izena ekimenari.