Diseinu berria edukitzeaz gain, hilero-hilero zozketa ezin bereziagoak egingo dira instalatuta dutenen artean.

Korrikarik gabeko urtea izan arren, Korrikarako eta Korrikazaleentzako albiste ona dakargu: aplikazioaren diseinua berritu dugu eta hurrengo Korrikari buruzko albiste nagusiak zuekin partekatu ditugu, dakizuenez dagoeneko buru-belarri baikabiltza haren prestaketan.

Kanta, ibilbidea, omendua... gauza asko izaten dira zuen interesekoak, eta aplikazioaren bitartez horien gaineko informazioa helaraziko dizuegu pixkanaka. Horrez gain, Korrikazaleokin harreman estuagoa eduki eta Korrikari agertzen diozuen fideltasuna eskertu nahi dugunez, gaurtik ekainera bitartean opari bereziak banatuko ditugu zuon artean zozketen bidez.

Hasteko, Korrikak Esne Beltzaren azken kontzertura gonbidatu nahi zaitu! Otsailaren 1ean, Bilbao Arenan, musika taldeak agur esango die oholtzei hamazazpi urte eta gero. Gainera, kontzertuan Korrikarekin lotutako ezustetxoa egoteaz gain, kartel zoragarria dakar. Taldea oso ondo lagunduta egongo da azken jai horretan, Fermin Muguruza, La Pegatina, Green Valley, Amak, Xiberoots, Chambao eta El Canijo de Jerez izango baititu ondoan, besteak beste, eta sorpresa gehiago ere izango direla iragarri dute. Bada, ekitaldi horretarako bost sarrera bikoitz lortzeko zozketak egingo ditugu, abenduan eta urtarrilean.

Gainerako opariei dagokienez, irabazle suertatuz gero, honako hauek eskuratuko dituzu: Korrika katilua, lau liburu, Berriarekin elkarlanean Korrikaren urteurrena ospatzeko sortutako trixerta, Praktikatu Zerbitzuaren opari-kutxa (motxila, bolaluma, kantinplora eta koadernoa) eta Malum Rex jatetxean afaltzeko zein bazkaltzeko 50 euroko bonua.

Zozketek prozedura erraza izango dute: aplikazioaren bitartez bidaliko dugun inprimakia bete (izen-abizenak, e-posta eta telefono-zenbakia) eta, besterik gabe, zozketetan parte hartuko duzu. Lehendabiziko zozketa larunbat honetan egingo dugu, Durangoko Azokarekin bat eginda.

Zeren zain zaude? Korrikaren bihotza zure sakelakoan: albisteak, nobedadeak eta informazio garrantzitsuena, dena leku bakarrean. Eskaneatu honako QR kodea eta unean bertan izango duzu Korrika aplikazioa!

NOIZ IZANGO DIRA ZOZKETAK?

• 1. ZOZKETA: abenduak 7, DA!
  -Korrika katilua, Praktikatu Zerbitzuaren opari-kutxa, lau liburu, Esne Beltzaren azken kontzerturako bi sarrera, KORRIKA trixerta, Malum Rex jatetxerako bonua (50 euro).

ZOZKETA BEREZIA (Esne Beltza ikusteko bi sarrera): abenduak 24
ZOZKETA BEREZIA (Esne Beltza ikusteko bi sarrera): abenduak 25
ZOZKETA BEREZIA (Esne Beltza ikusteko bi sarrera): urtarrilak 1

• 2. ZOZKETA: urtarrilak 17
  -Korrika katilua, Praktikatu Zerbitzuaren opari-kutxa, lau liburu, Esne Beltzaren azken kontzerturako bi sarrera, KORRIKA trixerta, Malum Rex jatetxerako bonua (50 euro).
• 3. ZOZKETA: otsailak 14
  -Korrika katilua, Praktikatu Zerbitzuaren opari-kutxa, lau liburu, KORRIKA trixerta, Malum Rex jatetxerako bonua (50 euro).
• 4. ZOZKETA: martxoak 14
  -Korrika katilua, Praktikatu Zerbitzuaren opari-kutxa, lau liburu, KORRIKA trixerta, Malum Rex jatetxerako bonua (50 euro).
• 5. ZOZKETA: apirilak 18
  -Korrika katilua, Praktikatu Zerbitzuaren opari-kutxa, lau liburu, KORRIKA trixerta, Malum Rex jatetxerako bonua (50 euro).
• 6. ZOZKETA: maiatzak 16
  -Korrika katilua, Praktikatu Zerbitzuaren opari-kutxa, lau liburu, KORRIKA trixerta, Malum Rex jatetxerako bonua (50 euro).
• 7. ZOZKETA: ekainak 12
  -Korrika katilua, Praktikatu Zerbitzuaren opari-kutxa, lau liburu, KORRIKA trixerta, Malum Rex jatetxerako bonua (50 euro).

Berria egunkariaren eta AEKren arteko elkarlanari esker, Korrikaren 44. urteurrena ospatzeko kamiseta jarri dugu salgai. Efemeridearen harira, 1. KORRIKA hura nolakoa izan zen azaldu dute elkarrizketa batean Lurdes Etxezarreta AEKko Nazio Kontseiluko kideak eta Ane Elordi Korrikako arduradunak.

 1. KORRIKAk Oñati eta Bilbo batu zituen, eta ezohiko garaian egin zen: azaroaren 29tik abenduaren 6ra. 1.820 kilometro egin zituen, gaueko hamarretan abiatuta. Aurrekontua ere bestelakoa izan zenegungoarekin alderatuta: 18.000 pezeta, gaur egungo 108 euro. “Oso xumea zen”, aipatu du Elordik.
Xabier Peña irakaslea izan zen omendua, eta leloa “Zuk ere esan bai euskarari”. Abestia Xabier Amuriza bertsolariak ondu zuen.

Korrika haren irudia baliatu du Malen Amenabar diseinugileak kamiseta sortzeko, eta Berriaren dendan dago salgai bai haurrentzat bai helduentzat. Halaber, Durangoko Azokan Berriaren postuan ere salgai izango dute, baita Gipuzkoako Bertsolari Txapelketako finalean ere. Horrez gain, Korrika aplikazioaren diseinu berria estreinatu dugula ospatzeko, hilero zozketak egingo ditugu opari bereziak banatzeko, tartean urteurrenaren kamiseta.

1. KORRIKAri buruz gehiago jakin nahi baduzu, gure webgunean haren historiari eskainitako atala daukagu, edizio bakoitzeko informazio nagusia biltzen duena.

Nazio-mailako mobilizazio erraldoia iragarri dute ekainaren 7rako, “Bagara” ekimenean.

Joan den larunbatean, hainbat ekitaldi kultural ospatu zituen Gure Esku Dago elkarteak hiriburuetan; AEK-Korrikaren izenean, Ane Elordi eta Lurdes Etxezarreta izan ziren bertan. Beste kontu batzuen artean, dei egin zuten ekainaren 7ko manifestazio erraldoirako, “Herri libre bat, Euskal Herriak erabaki” lelopean.

Gure Eskuk “Bagara” izeneko ekimenaren barruan iragarri zuen ekitaldia; AEK-Korrikak bat egin du deialdiarekin, bai eta gogorarazi ere hizkuntza-eskubideak ere badaudela giza eskubideen aldarrikapenaren barnean.

Ekitaldiez gain, Gure Esku Dagok Euskal Herria irudikatzeko hamabi orduko bideo-maratoi birtuala ere antolatu zuen larunbatean, eta horretan ere bere alea jarri zuen AEK-Korrikak, biak (AEK zein Korrika) zer diren azaltzeko ikus-entzunezko bat plazaratuta. Hementxe duzue ikusgai:

Lander Crespo klima-adituak gaia aztertu du, ISO 14067 arauari jarraituta eta bizi-ziklo osoa kontuan hartuta. Haren arabera, garraioa izan zen, azken Korrikan, isurketa gehienen jatorria: % 69, hain zuzen. Hala, garraioaren isuri handienak amaiera-egunean gertatu ziren: % 74, batik bat egun horretako desplazamenduek sortua. Ikerketaren helburu nagusia izan da emisioak murrizteko moduak topatzea hurrengo edizioetarako.

KORRIKA, euskararen aldeko ekimenik handiena, 1980tik ospatzen da Euskal Herrian. Aurten 23. edizioa egin da, eta, lehen aldiz, kalkulatu nahi izan dugu nolako karbono-aztarna sortzen duen gure ekintza jendetsuak, besteak beste haren ingurumen-inpaktuaren berri izateko eta, hurrengo edizioei begira, isuriak murrizteko aukerak aztertzeko.

Lander Crespo kliman adituak atzo Kalderapeko tabernan aurkeztu zuen bere master-amaierako lana; horren arabera, amaiera-ekitaldiak sortu zuen isurketa gehien 23. KORRIKAn, orduan bildu zelako jende-kopururik handiena. Izan ere, 2024ko KORRIKAren karbono-aztarnari buruzko azterketak ondorioztatu du inpaktu negatiboena parte-hartzaileen garraioak eragin zuela, bereziki amaierako ekitaldirako joan-etorriek. Ikerlaneko datuek diote emisioen % 69 inguru erregai fosilen bidezko ibilgailuek eragin zutela, eta, horietatik, amaierako ekitaldia ikustera joan ziren partaideen garraioak bota zuela isurien % 74.

Labur esanda, amaierako ekitaldiak isuri guztien % 55 ekarri zuen, garraioak sortu zuelarik kopuru horren % 92.

Ibilgailu pribatuak eta autobusak

Garraio-mota horiek erabili zituen nagusiki jendeak KORRIKAren amaiera ikustera bidaiatzeko: batez ere, ibilgailu pribatuak eta autobusak; eta beraiek izan ziren orduko karbono-isurien arrazoi nagusia. Bidaia luzeak eta milaka parte-hartzaile bildu zirenez, amaierako ospakizunak, garraioa zela-eta, eragin handia utzi zuen ingurumenean, KORRIKAren gainontzeko ekitaldiek baino askoz nabarmenagoa.

Hau da, amaierako ekitaldira bertaratzeko mugikortasunak izan zuen inpakturik handiena KORRIKAren karbono-aztarnan. Bestalde, salmentarako produktuek ere —arropa, esaterako— isurien % 19 sortu zuten; beraz, isurketen zati handi baten erantzule izan ziren. Aipagarria da, dena den, beste faktore batzuk ikerketatik kanpo geratu direla: elektrizitatea, azpiegituren muntaketa, ur-kontsumoa, KORRIKA Kulturalen barruko ekitaldiak, web-orriaren zein mugikorretarako aplikazioaren kudeaketa, eta publizitatearen, bideoen eta abestien prestaketa.

Hemendik aurrera isuriak murrizteko, lanak proposatzen du garraioaren erabilera optimizatzea eta salmenta-produktuen ingurumen-inpaktua txikitzea. Halaber, prozesuak eta datu-bilketa hobetzea ere gomendatzen du etorkizuneko kalkuluetarako.

Laburbilduz, KORRIKAk eta antzeko ekitaldi handiek ingurumen-inpaktu nabaria izaten dute, ezin ukatu; hortaz, kalkulu berri horiek, bistan da, lagungarriak izango dira ekintza jasangarriak identifikatzeko eta emisioak gutxitzeko. Izan ere, KORRIKA hainbat balioren inguruan sortu eta garatu da; horien artean daude, nola ez, ingurugiroaren babesa defendatzea eta haren kontrako jarduerak gutxitzen saiatzea.

Crespok, bide batez, antzeko ekitaldien karbono-arrastoak alderatu ditu. Haren hitzetan, KORRIKAk besteek baino askoz ere partaide gehiago izanik ere —milioi bat inguru—, New Yorkeko, Madrilgo eta Sevillako maratoiekin konparatuta —59.000, 34.000 eta 12.500 parte-hartzaile, hurrenez hurren—, beheko postuetan agertzen da kutsatze-mailan.

Atzoko agerraldian Ane Elordi Korrika arduradun nagusiak aipatu legez, KORRIKAtik ondoko mezu hau eman nahi dugu aditzera: “Izan daitezela euskararen oihartzuna, hanka nekatuak eta oroitzapen gozoak KORRIKAren aztarna bakarra!”. Cresporena kontuan hartuta, jada hiru azterketa egin dira KORRIKAren tutoretzapean; guztiak daude ikusgai (eta eskuragai) gure webgunean: 

https://www.korrika.eus/eu/korrika/ikerketak