Hizkuntza gutxituen erronka

24. KORRIKAk hizkuntza-komunitatea ekarri nahi du lehen lerrora. Hizkuntza gutxituek gero eta erronka handiagoa dute hiztunak zein hitz egiteko espazioak eskuratzeko edo orain artekoei eusteko; horregatik, ezinbestekoa da komunitatearen pertenentzia —identitatea— hizkuntzarekin izaniko gozamenezko bizi-esperientziei lotzea.

Horrelakoak dira Korrika eta hura bezalako ekimenak: hiztunen komunitatearen emozio-leherketa, herri-aldarri alai eta tinkoa; batzuentzat ahalduntze-bidea, askorentzat euskarara hurbiltzeko era.

Hauxe da, hain zuzen ere, AEKren xedea: Euskal Herriko biztanle guztiak euskaraz eroso bizitzea, eta egoera berbera nahi luke munduko hizkuntza gutxiagotu guztientzat.

Xede hori AEKk bere egin zuen bere garaian, 2021eko Batuz Aldatu* izeneko ekimenean oinarrituta.

AEK-KORRIKAk mezu hau zabaldu nahi du munduko bazter guztietan, eta, horri begira, ahalik eta lengoaia gutxiagotu gehienetara itzuli gura dugu. Beraz, horra hor erronka mundu osoko KORRIKA lagunontzat:

ITZULI BEHEKO TESTUA zuen inguruko hizkuntza gutxiagotuetan eta GRABATU BIDEO LABUR BATEAN, guk geure web-orrian txerta dezagun, eta hortik sareetan non-nahi heda dadin.

Itzulpena errazteko, ingelesezko, frantsesezko eta gaztelaniazko bertsioak ere badituzue eskuragarri.

Hizkuntza hegemonikoetan egindako itzulpenak ere jasoko ditugu, baina kasu horietan ez erabili glotonimoak, mantendu euskara hitz moduan.