Besteak beste, KORRIKAren historian bidaia egitea proposatzen dute; bilduma osoa webgune honetan dago eskuragarri.

23. KORRIKA ardatz, unitate didaktikoak aurkeztu dituzte gaur AEK-k eta KORRIKAk, Amaia Lopez de Luzuriaga eta Joseba Irazabal egileekin batera, Altsasuko Itsasi AEK euskaltegian.

Webgunean, aurrena, unitate laburrak topatuko ditugu; albiste motzak dira, edizio honetako kanta aitzakiatzat hartuta, KORRIKA badatorrela iragartzekoak. Ataza horiek abenduan argitaratu ziren, kanta publiko egitearekin batera. Horrez gain, behe-mailetarako, Ane Elordi Alburquerque KORRIKAko arduradun nagusiari egindako elkarrizketa ere txertatu dute. Unitate horiei lotuta, hamabi galderako Kahoot jolasa sortu da, behe-mailetako zenbait eduki errepasatzeko aukera ematearren.

Horrez gain, KORRIKA ibilbidearen jolasa dugu; urtero argitaratzen da, baina aurten nobedadeak dakartza. Horien artean, online galdetegia dugu. Horri esker, paperezko txartelak mozten ibili beharrean, irakasle-ikasleek online irakurri ahal izango dituzte galderak. KORRIKA ataleko txartelei dagokienez, ohiko galderez gain, “audioak eta bideoak” topa daitezkeela nabarmendu du Lopez de Luzuriagak. Unitate labur horri amaiera emateko, euskara-ikasleek KORRIKA aplikazioaren inguruko albistetxo bat irakurri ahal izango dute, ibilbidearen inguruko xehetasunak jakiteko.

Azkenik, unitatearen zati nagusia daukagu: Joseba Irazabalek sortua, “KORRIKA historian” du izenburua, eta gehienbat online egitekoa da. Bertan, ikasleari ibilbide birtual bat proposatzen zaio: KORRIKAtik KORRIKAra bidaiatzeko aukera izango du, hainbat hamarkadatan.

Lehendabiziko pantailetan, unitate osoko lanen azalpena aurkituko dugu. Ondoren, bideo batek KORRIKAren historia gogoraraziko digu, eta, hori ikusita, garaia hautatzeko pantailara helduko gara: KORRIKA 80ko hamarkadan, KORRIKA 90eko hamarkadan ala KORRIKA XXI. mendean. “Gure proposamena hirurak jarraian egitea da” azaldu du Irazabalek.

Garaia aukeraturik, beste bideo batzuk zabalduko zaizkigu, zeinek hamarkada bakoitzean KORRIKA nola garatu zen erakutsiko diguten, garai horretan euskarak eta munduak nolako egoera bizi zuten informatzeaz gain. Horrekin guztiarekin batera, hizkuntza- eta ulermen-jarduerak ere aurkituko ditugu bertan.

Lotura hemen: https://www.korrika.eus/eu/unitatedidaktikoak

Lander Garrok zuzendu du ikus-entzunezkoa. Ordu-erdi pasatxoko iraupena du, eta Azterketak Euskaraz kolektiboa osatzen duten Seaskako ikasle, irakasle, guraso eta ikasle ohien testigantzak jasotzen ditu.

Oihaletxea metafora bat da: euskara irudikatzen duen metafora, alegia.

Baina ez goaz spoilerrik egitera, ostegunean, otsailaren 8an, estreinatuko baita, ETB1n, 23:30ak aldera (Gora bihotzak saioa bukatutakoan). Asteburuan ere parada izango dugu ikusteko, eguerdian, kirolen tartea bukatu eta gero.

Harrapatu Oihaletxea’ ikusteko aukera, eta Harro Herri!

Irudia, dokumentalaren fotograma bat.

Gaur, Gaiarre antzokian, Nafarroako arduradun Asier Biurrunek KORRIKA Kulturalaren baitan estreinatuko den Xiberua kantu loraturik ekitaldiaren berri eman du.

Xiberua kantu loraturik Loraldiak ekoitzitako azken ikuskaria da, eta Zuberoako kantu tradizionalak ikuspegi garaikideaz taularatzen ditu. Otsailaren 22an aurkeztuko da Iruñeko Gaiarre Antzokian, arratsaldeko 19:00etan. Sarrerak antzokiaren webgunean eskura daitezke, 7 edo 5 euroan, laguntzaileek ekitaldi honetan ere abantaila izanen baitute.

Biurrunek gogora ekarri du Loraldiko beste bi ekoizpen ere Korrika Kulturalaren esparruan estreinatu direla: Kalaportu (2019) eta Hautsi da anphora (2022), batak zein besteak arrakasta handia lortuta. Biurrunek gehitu du azken ekoizpen hau garatzeko, Ipar Euskal Herrian aurki daitezkeen musikaririk eta ahotsik ederrenak eta berritzaileenak bildu direla, horien artean bere ondoan zegoen Julen Achiary, zeina, ahotsa eta perkusioa izateaz gain, gidari artistiko arituko den, Beñat Achiaryrekin batera.

Ondoren, Julen Achyaryk hartu du hitza, eta azaldu du Zuberoako sortzaileek tradiziotik abiatuta kultura garaikide aberatsa loratu dutela. Basa-aireak, kantuak eta irudiak uztartzen dituen ikuskaria dela aurreratu ostean, herri-kantu horien aberastasun esentzialarekin esperimentatzeko gonbita luzatu du.

“Iraganari so egingo diogu geroa marrazteko. Antzinako kantuak izango dira, baina garaikidetasun-eremuan kokatuko ditugu. “Belatxa” kantan, adibidez, non hegazti baten hegaldia kantatzen den, ez da faltako sormen zirraragarria. Gaur egun, orain dela milaka urte bezala, naturak eskaintzen digun nortasunaz baliatzen gara. Etorkizuneko hodeiertza dugu ikusmiran” gehitu du, ekoizpen hau aurrera aterako duen sortzaile-taldeari erreparatu aurretik.

Bukatzeko, Biurrrunek Korrika Kulturalaren baitan Nafarroa osoan egingo diren hainbat ekitaldi aurkeztu ditu: Lander Garroren Oihaletxea dokumentala, eMCumeak”Antsoainen, Belarriprest Tafallan, Euskaldun berrien kluba Bortzirietan eta Mugiron, Gure erro eroak Zangozan, BADON* Auritzen eta Altsasun edo Bihotz... bi hots Iruñean, besteak beste. Amaieran, gogorarazi du, hurrengo asteotako agenda ekitaldiz elikatzen den heinean, KORRIKAren webgunearen AGENDA atalean ere eguneratuta egongo dela ikusgai.

Egunotan hainbat herritan aurkeztu/ko da euskararen aldeko ekimen erraldoia.

Atzo (otsailak 1) Bilboko lagunen txanda izan zen. Bilborocken elkartu ziren KORRIKAren lagunak, eta aurkezpena bukatutakoan, Mixerabliak taldearen musikarekin gozatzeko aukera izan zuten.

Photocalla ere egon zen. Argazkiak ikusi nahi?

Eskerrik asko hurbildu zineten lagun guztiei. HARRO HERRI!